Шрифт:
Закладка:
Седмое[943]
Иереем самым быти благоговейным и учителным, а не кощунником, срамословцем, гордым, гневливым, безстудным, (Л. 68 об.) пияницам, ропотником, мятежником; и не дерзати бити согрешающыя, «но исправляти таковыя в дусе кротости»[944], по святому апостолу, словом учителства, преслушающыя же наказывати запрещенми и отлученми.
Осмое[945]
Иереем, уведевшым кого еретика или расколника, увещати и обращати к православию и единомыслию Святыя Восточныя Церкви. Не покаряющихся же упорников, по первом и втором наказании, церковный вход таковым возбраняти, и ради мздовосприятия или человекоугодия таковых не таити, но возвещати нашей мерности или по месту архиереем.
Девятое[946]
Истинным пастырем: не обиноватися лиц силных, ниже усрамлятися богатых, но зле живущыя и не кающыяся обличати, умоляти и запрещати. Вдов, сирот и всех, не имущих помощи от обидящих, (Л. 69) заступати и защищати. В правде же о таковых и душу свою полагати (по словеси Христову)[947] должно есть.
Десятое[948]
Всем священным сущым и людином: ведети нуждно[949] десять заповеди, в Древлнем[950] Завете Богом преданыя, и в Новом подтвержденыя, и изучати я́ изустно и хранити непрезорно. К сему же и церковныя заповеди блюсти. И знати известно седмь Святыя Таины церковныя и право о них мудрствовати по преданию Святыя Восточныя Церкви. И стрещися от грехов смертных, паче же от мстительных, вопиющих к Богу на творящыя их.
Первонадесятое[951]
Овцам же словесным пасомым: от своих пастырей слушати поучателных их словес, предлагаемых от Божественных Писаний, и самих их почитати, яко детем отцев, и яко удесем главу, и во всем повиноватися им по апостолу, глаголющу: «Братие, повинуйтеся наставником вашим и покаряйтеся, (Л. 69 об.) тии бо бдят о душах ваших, яко имут воздати слово Господу о вас в день судный»[952]. С еретикы же[953] не сообщатися, ни любитеся[954]: врази бо суть Божии и веры православныя. Кто же суть еретици? Вси, не общащиися Святей Кафоличестей Церкви, суть еретици. Кафолическая же Церковь едина: Православная, Восточная. Еретичестии же, аще и нарицаются «церкви», но не суть, но сонмицы суть.
12[955]
Всем православным христианом: жити благочестиво по отцепреданым Святыя Восточныя Церкве догматом в чистоте и трезвости. Заповеди Божия хранити и во церковь Божию неленостно прибегати, аще можно, со всеми своими домочадцы, паче же в недели и праздники; церковнаго всякаго последования отнюдь не оставляти; пришедшым же стояти со благоговением, и молчанием, со вниманием же, и сокрушением сердца, молящымся о гресех своих, и слушати словес, прочитаемых от писаний, святых отец собраных, (Л. 70) и теми душу свою питати. Латинских же, и лютерских, и калвинских прелестных всяких учений и обычаев тлетворных весма не приимати, ниже како либо сообщатися с ними, но яко скверны гнушатися их и отвращатися. Аще убо приобщаяйся неприобщену не приобщен есть, по правилу 45 святых апостол[956], колми паче еретиком сообщаяся или содружествуя отлучению достоин от Святыя Церкви и от христианскаго сообщения и соклевретства!
13
Всякаго чина сущым православным христианом: царя православнаго почитати, любити и боятися его: «не туне бо меч носит»[957], и страх его не на погибель, но паче на спасение, от еже бо, еже боятися царя, раждается и еже боятися Бога и творити волю Его святую; воля же Божия раждает, еже комуждо жити трудолюбно: пищу, и одежду, и прочыя потребы стяжавати от своих трудов, или рукоделий, или от иных каковых приобретений, но праведных (от нихже и дар Богу (Л. 70 об.) приносити, и милостыню творити по силе: милуяй бо нища, взаим дает Богу; таже и священником и прочым церковником, яко служащым Церкви и о всех православных молящымся, подаяти), а не от хищения, и грабления, и проклятаго мздоимства, и лихвы, сиречь росту, или якова либо насилства стяжаная. За сим (или, паче, прежде сих всех) никому ничим должным быти, наипаче же делающым что либо мзду всецелую отдаяти без умаления и продолжения: удержаваемая бо мзда кричит, и вопли ея входят в уши Господа Саваоф. Яко убо «убиваяй ближняго, отъемляй поживление, и изливаяй кровь» судится[958], тако лишаяй или уемляй, рекше, умаляяй мзду делателя и зде казним бывает от Бога, и в будущем веце. Грех бо сей есть присно от Бога отмстителен. За сим и сами между себе[959] друг друга, паче же святых домов – церквей и монастырей – не обиждайте. К селом и домом своим границ, сиречь меж, не прелагайте, и соседних нив, и домов (Л. 71) к своим не присовокупляйте, и обидящым иныя воспрещайте: «Не бо едини вселистеся на земли». «Увы же присовокупляющым село к селу и дом к дому, да ближняго что отимут». «Запустошатся[960] бо велиции и добрии доми, – глаголет Господь Саваоф[961], – и не будут живущии в них»[962]. Не моя суть сия словеса, но Самаго Бога, чрез Исаиа пророка глаголющаго.
14
Князи, и боляре, и вси учинении судие земстии: праведно суд судите. Изимити обидима из руки обидящаго, разсмотряйте между винным и невинным опасно, никого щадяще в суде, ни богата, ни убога не стыдящеся, ниже боящеся лица силных. Сам убо глаголет Бог: «Не судите по лицу, но праведен суд судити»[963]. И «творяй неправеднаго праведна, проклят есть, мерзок же и ненавистен от Господа»[964]. Суд бо праведный – суд есть Божий, зане «Бог праведен есть и правду возлюби»[965]. А неправедное суждение – сатанинское есть угождение. «Творяй же и любяй неправду, ненавидит свою (Л. 71 об.) душу»[966]. Ниже убо мздою очеса своя ослепляйте: «Мзда бо и дары слепят очи и мудрых»[967]. И любящии дары – общници суть татем и разбойником[968]. И «увы неправеднаго оправдающым даров ради»[969]. Зде убо дароприемцев вещественый[970] огнь домы пожигает, в будущем же и сами дароимцы в неугасном огни горети будут вечно.
Емлющии оброки и дающии иным: не творите в приятии излишества[971] и во отдатии умаления
